Azərbaycanın müasir tarixində elə günlər var ki, onların əhəmiyyəti zaman keçdikcə daha aydın görünür. 17 oktyabr da məhz belə tarixlərdəndir. 2020-ci ildə Füzuli şəhərinin işğaldan azad edilməsi xalqımızın uzun illər davam edən yurd həsrətinə son qoyan, milli qürurumuzu yüksəldən və Vətən müharibəsində qələbəyə aparan mühüm hadisələrdən biri oldu. Bu gün həmin tarixi hadisənin altıncı ildönümünü qeyd edən Azərbaycan təkcə hərbi uğurları ilə deyil, azad edilmiş torpaqlarda həyata keçirdiyi genişmiqyaslı quruculuq layihələri ilə də yeni inkişaf mərhələsini yaşayır.

17 oktyabr – Füzuli Şəhəri Günü xalqımızın qəhrəmanlıq salnaməsində özünəməxsus yer tutur. Prezident İlham Əliyevin müvafiq Sərəncamı ilə təsis olunan bu əlamətdar gün Azərbaycanın ərazi bütövlüyü uğrunda aparılan mübarizənin, Ordumuzun şücaətinin və xalqımızın sarsılmaz iradəsinin rəmzidir. Füzulinin azadlığı uğrunda canından keçən şəhidlərimizin xatirəsi, sağlamlığını itirən qazilərimizin fədakarlığı hər zaman böyük ehtiramla yad edilir.

Füzuli Azərbaycanın qədim yaşayış məskənlərindən biri olmaqla zəngin tarixi, mədəni və mənəvi irsə malikdir. Şeyx Babi Yaqub türbəsi, Mirəli türbəsi və digər tarixi abidələr bu diyarın əsrlər boyu formalaşmış mədəniyyətinin qiymətli nümunələridir. Lakin 1993-cü ildə rayonun böyük hissəsinin işğal olunması Füzulinin həyatında ağır və faciəli dövrün başlanğıcına çevrildi. Minlərlə insan doğma yurdundan didərgin düşdü, yaşayış məntəqələri dağıdıldı, tarixi və dini abidələrə ciddi ziyan vuruldu. Buna baxmayaraq, füzulililər doğma torpaqlarına qayıdacaqları günə inamlarını heç vaxt itirmədilər.

2020-ci ilin payızında Azərbaycan Ordusunun başladığı əks-hücum əməliyyatları Füzulinin taleyində yeni səhifə açdı. Düşmənin uzun illər ərzində yaratdığı çoxpilləli müdafiə istehkamlarının yarılması hərbi baxımdan böyük əhəmiyyət daşıyırdı. Azərbaycan əsgəri çətin relyef və gücləndirilmiş müdafiə mövqelərinə baxmayaraq, yüksək döyüş əzmi nümayiş etdirərək irəlilədi. Füzuli istiqamətində qazanılan uğurlar sonrakı əməliyyatların gedişinə mühüm təsir göstərdi.

Oktyabrın 17-də Füzuli şəhəri ilə yanaşı, Qoçəhmədli, Çimən, Cuvarlı, Pirəhmədli, Musabəyli, İşıqlı və Dədəli kəndlərinin azad edilməsi bütün Azərbaycanda böyük sevinc doğurdu. Həmin gün Prezident, Müzəffər Ali Baş Komandan İlham Əliyev xalqa müraciət edərək bu tarixi müjdəni çatdırdı. Onun səsləndirdiyi “Füzuli bizimdir, Qarabağ Azərbaycandır!” sözləri milli birlik və Zəfər ruhunun ifadəsinə çevrildi.

Füzulinin azad olunması yalnız bir şəhərin işğaldan qurtarılması demək deyildi. Bu qələbə Azərbaycanın öz torpaqlarına sahib çıxmaq əzmini, xalqla ordunun vəhdətini, uzun illər davam edən mübarizənin nəticəsini bütün dünyaya nüma